“Лейлек Сүт” ишканасы күнүнө 600 литр сүттү кайра иштетүүдө
Ветеринария, мал чарбасын өнүктүрүү, жайыт жана тоют кызматынын жетекчиси Адилет Сотовалдиев Лейлек районунун Кулунду айыл өкмөтүндө жайгашкан “Лейлек Сүт” сүттү кайра иштетүү ишканасынын ишмердүүлүгү менен таанышты.
Айыл чарба министрлигинин маалыматына ылайык, иш сапардын жүрүшүндө жетекчи ишкананын өндүрүштүк мүмкүнчүлүктөрүн, жабдууларынын абалын жана чыгарылып жаткан продукциялардын түрлөрүн көрүп чыкты. Ишкананын өндүрүштүк кубаттуулугу күнүнө 1 тонна сүттү кайра иштетүүгө мүмкүнчүлүк берет.
Бүгүнкү күндө ишканада күн сайын 500 – 600 литр сүт кайра иштетилип, андан айран, каймак жана балмуздак өндүрүлүүдө. Даяр продукциялар жергиликтүү соода түйүндөрүнө жеткирилип, калкты сапаттуу сүт азыктары менен камсыз кылууга багытталган.
Адилет Сотовалдиев сүттү кайра иштетүүчү ишканалардын айыл чарба тармагын өнүктүрүүдөгү маанилүү ролун белгилеп, жергиликтүү өндүрүштү кеңейтүү, чийки зат базасын чыңдоо жана ата мекендик продукциялардын көлөмүн көбөйтүү боюнча иштерди улантуу зарылдыгын айтты.
