Бишкек мэри "Мадина" базарынын соодагерлери менен жолукту
Бишкек шаарынын мэри Айбек Джунушалиев "Мадина" базарынын соода түйүндөрүнүн ээлери менен жолугушуп, объектти алдыда күтүлүп жаткан реконструкциялоо иштерин талкуулады.
Мэриянын маалыматына ылайык, жолугушууда 2026-жылдын 1-августунан тарта базарды реконструкциялоо планы каралды. Бул иштер борбор калааны көрктөндүрүү жана шаардык чөйрөнү өнүктүрүү программасынын алкагында жүргүзүлөт.
Муниципалитет ишкерлерге базардын айланасында жайгашкан жаңы соода орундарын пайдаланууну сунуштады.
Жолугушууда Айбек Джунушалиев реконструкция шаардагы тартипти күчөтүүгө жана шаардык инфраструктураны жакшыртууга багытталганын белгилеп, ишкерлердин укуктары жана мыйзамдуу кызыкчылыктары толук эске алынарын айтты.
Жыйындын соңунда ишкерлер бардык маселелерди биргелешип кароо үчүн атайын комиссия түзүүнү сунушташты. Мэр бул демилгени колдоп, комиссияны үч күндүн ичинде түзүүнү тапшырды.
Маалыматка ылайык, комиссияны Бишкек шаарынын мэринин орун басары Атай Муратбек жетектейт. Анын курамына ишкерлердин өкүлдөрү, ошондой эле мэриянын, акимиаттын, архитектура жана курулуш тармагындагы мекемелердин, юридикалык кызматтардын жана башка мамлекеттик органдардын өкүлдөрү кирет.
Жолугушуунун соңунда тараптар учурдагы соода жайларын жана ишкерлерге сунушталган жаңы орундарды жеринен көрүп чыгып, аларды жайгашуу шарттарын талкуулашты.
