Юридикалык жактар августка чейин бенефициардык менчик ээлерин каттатышы керек
Юстиция министрлиги 1-мартка чейин мамлекеттик каттоодон өткөн юридикалык жактар, филиалдар жана өкүлчүлүктөр 1-августка чейин өздөрүнүн бенефициардык менчик ээлери тууралуу маалыматтарды каттоочу органга берүүгө милдеттүү экенин эскертти.
Министрликтин маалыматына ылайык, бул талап Министрлер Кабинетинин 2026-жылдын 17-апрелиндеги №257 токтомунда каралган.
Маалыматтар Юстиция министрлигинин 30-апрелдеги буйругу менен бекитилген атайын форма боюнча министрликтин аймактык бөлүмдөрүнө тапшырылат. Форма министрликтин расмий сайтына жайгаштырылган.
Ошондой эле юридикалык жактын менчик түзүмү өзгөргөн учурда, бенефициардык менчик ээси тууралуу жаңыланган маалымат да өз убагында берилиши керек.
Министрлик талаптарды аткарбагандар жоопкерчиликке тартыларын эскертти. Бенефициардык менчик ээлери тууралуу маалыматтарды берүү талаптарын бузган жеке жактарга 12 миң сом, ал эми юридикалык жактарга 57 миң сом өлчөмүндө айып пул салынат.
Юстиция министрлиги юридикалык жактарды, филиалдарды жана өкүлчүлүктөрдү толук жана ишенимдүү маалыматтарды белгиленген мөөнөттө берүүгө чакырды.
