Бишкекте дизайн-код ишкерлерге акысыз берилет
Бишкек шаарынын мэри Айбек Джунушалиев муниципалитет тарабынан бекитилген дизайн-код жарандарга жана ишкерлерге акысыз берилиши керектигин билдирип, бул боюнча тиешелүү кызматтарга тапшырма берди.
Анын айтымында, дизайн-код борбор калаанын бирдиктүү архитектуралык көрүнүшүн калыптандыруу максатында мэриянын демилгеси менен иштелип чыккан. Бирок учурда аны алуу үчүн жарандардан акча талап кылынганы боюнча кайрылуулар түшүүдө.
Мэр белгилегендей, шаар тургундары түз эфир учурунда дизайн-кодду алуу же объектилеринин сырткы көрүнүшүнө коюлган талаптарды билүү үчүн 100 миң сом төлөп жатышканы тууралуу суроолорду көтөрүшкөн.
Айбек Джунушалиев муниципалитет тарабынан бекитилген эрежелерди берүү үчүн жарандардан акча алууга жол берилбей турганын баса белгиледи. Ал бекитилген бардык дизайн-коддор белгиленген тартипте даярдалып, кайрылган жарандарга жана ишкерлерге акысыз берилиши керектигин айтты.
Жыйындын жыйынтыгында тиешелүү кызматтарга кызматтык иликтөө жүргүзүү тапшырылды. Эгер мыйзамсыз акча өндүрүү же башка мыйзам бузуулар аныкталса, материалдар укук коргоо органдарына өткөрүлүп берилери маалымдалды.
