Таластык ишкер тоок чарбасын кеңейтип, 500 жумуш ордун түзүүнү көздөйт
Манас районунда жашаган Рахматжан Сатыбалдиев эт багытындагы тоок чарбасын өнүктүрүп жатат. Учурда ишкер 5 миңден ашуун жөжө багууда.
Айыл чарба министрлигинин басма сөз кызматы билдиргендей, ал чарбасын кеңейтүү максатында райондук агрардык өнүктүрүү башкармалыгына жер алуу боюнча кайрылган. Учурда маселени чечүү боюнча тиешелүү иштер жүрүп жатат.
Ишкердин айтымында, жер маселеси чечилсе, эт багытындагы тооктордун санын 500 миңге чейин жеткирүүгө аракет кылат. Даяр өндүрүм анын өзүнө таандык колбаса цехинде колдонулат.
Долбоор толук ишке ашса, жаңы ферма 500гө жакын адамды жумуш менен камсыз кылары белгиленди.
