Мэрия: Бишкекте ишкерлерден мыйзамсыз акча талап кылгандарга чара көрүлөт
Бишкек мэриясында мыйзамдуулукту жана кызматтык тартипти сактоо, ошондой эле коррупциялык тобокелдиктердин алдын алуу боюнча кеңешме өттү. Бул тууралуу муниципалитеттен билдиришти.
Жыйынга мэриянын аймактык жана ведомстволук бөлүмдөрүнүн, муниципалдык аймактык башкармалыктардын жетекчилери катышты.
Кеңешмеде Бишкекте эл аралык маанидеги ири иш-чараларды даярдоо жана өткөрүү учурунда мыйзам талаптарын так сактоо маселеси талкууланды.
Өзгөчө көңүл ишкерлер менен иш алып барууга бурулду. Мэрия иш-чараларды өткөрүүнү шылтоо кылып, ишкерлерди оңдоо же көрктөндүрүү иштерине, товар жана кызмат сатып алууга мажбурлоого, ошондой эле алардан акча талап кылууга же чогултууга жол берилбей турганын белгиледи.
Кызматтык абалынан пайдаланып ишкерлерге мыйзамсыз басым көрсөтүү, материалдык пайда талап кылуу же алардын мыйзамдуу ишмердүүлүгүнө тоскоолдук кылуу фактылары аныкталса, тиешелүү материалдар укук коргоо органдарына өткөрүлөт.
Жыйынтыгында жетекчилерге кызматкерлердин ишине көзөмөлдү күчөтүү, коррупциялык көрүнүштөргө жана мыйзамсыз талаптарга жол бербөө тапшырылды.
Мэрия коррупция, кызматтык абалынан кыянаттык менен пайдалануу жана башка мыйзам бузуулар аныкталган учурда тиешелүү чаралар көрүлөрүн эскертти.
