Эмгекчилердин укугун коргоо боюнча кызматташуу макулдашылды
Кесиптик бирликтер федерациясынын төрагасы Мурадил Жумадилде уулу менен Эл аралык ишкерлер кеңешинин аткаруучу директору Аскар Сыдыков кызматташуу жөнүндө макулдашууга кол коюшту.
Федерациянын басма сөз кызматынын маалыматына ылайык, макулдашуу тараптардын социалдык өнөктөштүгүн бекемдөөгө, кызматкерлердин укуктарын коргоого жана иш берүүчүлөр менен кызматкерлердин ортосунда конструктивдүү диалогду өнүктүрүүгө багытталган.
Тараптар эмгек мамилелери, эмгекти коргоо жана укуктук сабаттуулукту жогорулатуу боюнча биргелешкен долбоорлорду ишке ашырууну көздөшүүдө. Ошондой эле окутууларды жана эксперттик жолугушууларды өткөрүү каралган.
Мындан тышкары, жаштар үчүн демилгелерди ишке ашырууга, кызматкерлердин кесиптик өнүгүүсүнө, эмгек талаш-тартыштарынын алдын алууга жана социалдык жоопкерчиликтүү бизнести өнүктүрүүгө көңүл бурулары белгиленди.
