Жеке ишкерлер үчүн салык чендери: жеңилдиктин шарттары кандай?
"Салык сервис" мамлекеттик мекемеси жеке ишкерлер үчүн кирешеге жана ишмердүүлүктүн түрүнө жараша колдонулуучу жеңилдетилген салык чендери тууралуу маалымат жарыялады.
Ага ылайык, калкка гана товар сатып, кызмат көрсөтүп, акыркы 12 айда катары менен 15 млн сомдон ашпаган киреше тапкан жеке ишкерлер белгиленген талаптарды сактаган учурда 0%дык салык ченин колдоно алышат.
Бул үчүн жеке ишкердин жумушчулары болбошу, ККМди милдеттүү түрдө колдонушу жана камсыздандыруу төгүмдөрүн өз убагында төлөшү керек. Ошондой эле соода тармагында бир гана соода түйүнү болушу талап кылынат.
Эгер киреше 15 млн сомдон ашса, ККМ боюнча талаптар сакталбаса же жеңилдикке кирбеген кошумча ишмердүүлүк жүргүзүлсө, 0% жеңилдик колдонулбай калат. Мындай учурда бирдиктүү салыктын стандарттык чени колдонулат.
Ошондой эле жылдык жүгүртүүсү 50 млн сомго чейинки соода үчүн 0,5% жеңилдетилген чен каралган. Бул ченди адистештирилбеген товарларды саткан ишкерлер гана колдоно алышат.
Жүгүртүү 50 млн сомдон ашкан же кошумча ишмердүүлүк түрү пайда болгон учурда соода үчүн накталай төлөмдө стандарттык 4% жана накталай эмес төлөмдө 2%дык чендер колдонулат.
