Самаркандекте соодагерлер үчүн шарттар түзүлүп, жаңы соода жайы курулууда
Самаркандек айыл өкмөтүндө калктын жашоо шартын жакшыртууга багытталган бир катар иштер жүргүзүлүүдө. Бул тууралуу Баткен райондук мамлекеттик адмистрациясынан билдиришти.
Маалыматка ылайык, аймакта базардын кийим-кече сатылган 80 метрлик соода аянты толугу менен оңдолуп, 50дөн ашуун ишкер үчүн ыңгайлуу шарттар түзүлдү.
Мындан тышкары, соодагерлер үчүн 50 орундуу жаңы соода жайы да курулууда.
Паскы-Арык айылында 7 гектар жерди тамчылатып сугарууга ылайыкталган суу сактагычтын курулуп жатат. Ошондой эле Паскы-Арык, Жайылма жана Чек тилкелериндеги ички арыктар бетондолууда.
Белгиленгендей, айыл өкмөт башчысы Тайырбек Рахмановдун жетекчилиги астында аймактагы көйгөйлүү маселелер кезеги менен чечилип, инфратүзүмдү жакшыртуу багытындагы иштер мындан ары да улантылат.
