Чач жасалгалоо, онлайн кийим сатуу же сабак берүү: кантип мыйзамдуу иштөө керек?
"Салык сервис" мамлекеттик мекемеси өз алдынча иштегендер кайсы учурда патент алып, кайсы учурда жеке ишкер (ИП) катары катталышы керектиги тууралуу маалымат жарыялады.
Ага ылайык, ишмердиктин түрүнө жараша салык төлөө айырмаланат. Маселен, тырмак жасоо, боёнтуу жана чач тарач кызматтарын көрсөткөндөр патент менен иштей алышат.
Ал эми инстаграм аркылуу кийим саткандар жеке ишкер катары катталышы керек. Анткени социалдык тармак аркылуу кийим сатуу патенттин тизмесине кирбейт.
Үйдөн буюртма менен таттууларды жасагандар да ИП ачып, "нан жана ундан жасалган кондитердик азыктарды өндүрүү" ишмердиги менен иш жүргүзүшү керек.
Фотографтар, жеке сабак берүүчү жана чет тил мугалимдери патент менен иштей алышат. Батир оңдогондор патентти жеке адамдарга гана кызмат көрсөткөн учурда колдоно алышат. Юридикалык жактарга кызмат көрсөтүүдө ИП ачуу зарыл.
Программисттер, SMM адистери жана UX/UI дизайнерлер жек ишкер катары катталууга тийиш. Ал эми автоунаа, телефон жана смартфон оңдоо, котормочулук, жүк ташуу жана иш-чараларды тейлөө сыяктуу кызматтар тиешелүү ишмердик патенттин тизмесине кирген учурда патентти колдонот.
"Салык Сервис" патент менен иштегендер юридикалык жактарга расмий түрдө кызмат көрсөтө албай турганын эскертти.
