Бакай-Атада ишкер мөмө-жемиштерди сактап, чет өлкөгө экспорттоону көздөйт
Талас облусунун Бакай-Ата районунда "Айыл чарбасында климаттын өзгөрүшүнө туруктуу кошумча нарк чынжырчаларын өнүктүрүү" долбоорунун алкагында жеңилдетилген насыя алгандардын ишмердүүлүгүнө мониторинг жүргүзүлдү.
Айыл чарба министрлигинии эл аралык долбооорлорун ишке ашыруу бөлүмү билдиргендей, долбоордун адистери жеке ишкер Тунук Атакулованын мөмө-жемиш сактоочу кампасына барышты.
Ишкер жеңилдетилген насыя алып, каражатка заманбап муздаткыч жабдууларын сатып алган. Учурда алар толук орнотулуп, кампа иштеп жатат.
Тунук Атакулова жергиликтүү өндүрүүчүлөрдөн кара өрүктү сатып алып, аны сактоого жана коңшу өлкөлөргө экспорттоого даярдоодо.
Ишкердин айтымында, насыянын өз убагында берилиши керектүү жабдууларды сезон башталганга чейин сатып алып, кампаны толук кандуу ишке киргизүүгө мүмкүнчүлүк түзгөн.
Белгиленгендей, мындай колдоо айыл чарба азыктарын сапаттуу сактоого жана жергиликтүү фермерлердин өндүрүмүн сатуу мүмкүнчүлүктөрүн кеңейтүүгө өбөлгө түзөт.
