Кыргызстанда бизнеске коррупцияга каршы эл аралык стандарттарды киргизүү талкууланды
Кыргызстанда коммерциялык уюмдардын ишине коррупцияга каршы эл аралык ак ниет башкаруу стандарттарды жана корпоративдик башкаруу принциптерин киргизүү маселеси талкууланды. Бул тууралуу Экономика жана коммерция министрлигине караштуу Финансы рыногун жөнгө салуу жана көзөмөлдөө кызматынан билдиришти.
Билдирүүгө караганда, 16-октябрда өткөн иш-чарага банктардын, камсыздандыруу уюмдарынын, ломбарддардын, лизинг компанияларынын, мамлекеттик эмес пенсиялык фонддордун, баалуу кагаздар рыногунун жана кумар бизнесинин өкүлдөрү катышты.
Жолугушууда CERT International эл аралык сертификациялоо органынын өкүлү Ильдар Инелеев ISO 37001 коррупцияга каршылык көрсөтүү системасынын талаптары, аны ишканаларга киргизүүнүн артыкчылыктары жана сертификациялоо тартиби тууралуу маалымат берди.
Ошондой эле катышуучулар бизнесте коррупциялык тобокелдиктерди аныктоо жана азайтуу, ишкердик этиканы сактоо, жетекчилердин жоопкерчилигин жогорулатуу жана корпоративдик башкарууну жакшыртуу маселелерин талкуулашты.
Маалыматка ылайык, бул иштер Кыргызстанда 2025–2030-жылдарга коррупцияга каршы күрөшүү боюнча мамлекеттик стратегиянын алкагында жүргүзүлүүдө.
Финкөзөмөл мындай иш-чаралар бизнесте ачык-айкындуулукту камсыз кылууга, коррупциянын алдын алууга жана эл аралык башкаруу тажрыйбасын жайылтууга багытталганын белгиледи.
