2022-жылы республикалык бюджетти колдоого 105 млн доллар каралды - Татиков
Финансы министринин орун басары Руслан Татиков министрликтин Инстаграмдагы баракчасынан түз эфирге чыгып, республикалык бюджеттин тартыштыгынын тышкы жана ички каржылоо булактары тууралуу маалымат берди.
Анын берген маалыматына ылайык, республикалык бюджеттин тартыштыгынын ички каржылоо булактары – мамлекеттик баалуу кагаздар, ал эми тышкы булактары – сырттан келген насыялар болуп саналат. Мамлекеттин баалуу кагаздарынын эки түрү бар: мамлекеттик казыналык вексель жана мамлекеттик казыналык облигациялар. Мына ушул экөө бюджеттин тартыштыгына колдонулат.
Ошондой эле Татиков интернет колдонуучулардын бул жылы бюджетке сырттан канча каражат келгендиги тууралуу суроосуна жооп берди.
“Кредиттер тууралуу айта турган болсок, мамлекеттик инвестициялар программасы жана бюджетти колдоо программалары болуп бөлүнөт. Республикалык бюджетке 80 млн АКШ доллары каралган. Бул Евразия турукташтыруу фондунун каражаты жана экинчи кредит Дүйнөлүк банктыкы, ал 50 млн АКШ долларын түзөт, анын ичинен 25 млн доллары – грант жана 25 млн доллары – кредит. Бюджетти колдоого жалпысынан бул жылы 105 млн доллар каралды.
Мамлекеттик инвестициялар тууралуу айта турган болсок, 2022-жылга карата 36 млрд сом каралган. Анын 21 млрд сому кредит, 14 млрд сому грант болуп эсептелет”, – деди Татиков.
Ошондой эле ал 2022-жылдын 8 айындагы отчету боюнча мамлекеттик баалуу кагаздарга 15 млрд 600 млн сом каралганын кошумчалады.
