КР Бразилия, Индия, Афганистан өлкөлөрүнөн 35 млн долларлык кумшекер импорттоду
Үстүбүздөгү жылдын январь-июль айларында Кыргызстанга дээрлик 70 миң тонна кумшекер импорттолсо, өткөн жылдын ушул мезгилинде 20.4 миң тонна гана ипорттолгон. Улуттук статистикалык комитеттин маалыматы боюнча, Бразилия жана Индия КРга кумшекер сатуу боюнча лидер болушту.
Бразилия КРга быйыл 35.4 миң тонна кантты 20 млн долларга сатып, негизги импортер болду. Өткөн жылы болсо Кыргызстан ал өлкөдөн эч нерсе сатып алган эмес. Экинчи орунда болсо Индия турат – ал дээрлик 14 млн долларга 20.3 миң тонна кумшекер саткан. Өткөн жылы Кыргызстан бул өлкөдөн кумшекер алган эмес.
Белгилей кетсек, КР Афганистандан 1.1 млн долларга дээрлик 2 миң тонна кумшекер сатып алган, бул өлкө да Кыргызстанга продукциянын мындай түрүн мурда импорттогон эмес.
Эскерте кетсек, Монополияга каршы агенттик Октябрь айында кумшекердин баасынын төмөндөшү күтүлүп жатканын, ага себеп, жергиликтүү кант кызылчасы бышып калганын билдирген болчу.
Буга чейин Economist.kg кабарлагандай, республикага негизинен Индиядан чыгарылган кум шекер алынып келинип жаткан. Ал эми “Кайыңды-Кант” ААК жана “Кошой” ААК заводдору Бразилиядан алынып келинген чийки кум шекерден өндүрүп жатышкан. Логистикадан улам, базарларда сатылып жаткан кум шекердин баасы ата мекендик кант кызылчасынын кум шекерине караганда жогору болуп жаткан эле.
