Кыргызстандын ИДПсынын өсүшү 2022-2023-жылдары 7% деңгээлинде болжолдонууда - ЕРӨБ

Европа реконструкциялоо жана өнүктүрүү банкы (ЕРӨБ) Борбор Азия, анын ичинде Кыргызстан боюнча божомолун кайра карап чыкты. Бул тууралуу банктын “Аймактык экономикалык келечек” деп аталган отчеттук баяндамасында айтылат.

«КРнын экономикасы реэкспорт, акча которуу жана россиялык компаниялардын жана жеке адамдардын өлкөгө көчүп келүүсүнүн эсебинен пайда көрүшү мүмкүн. Ошол эле учурда ИДПнын өсүшү 2022-жылы да, 2023-жылы да 7% деңгээлинде болжолдонууда», – дейт аталган банк.

Адистердин айтымында, рублдин бекемделиши жана Россияда импорттук жумушчу күчкө болгон суроо-талаптын жогору болушу 2022-жылдын биринчи жарымында Кыргызстанга акча которуулардын 11%га өсүүсүнө алып келген.

“Бул ички суроо-талапты колдоп, өнөр жай өндүрүшүнүн, туризмдин, сооданын жана жүк ташуунун өсүшүн камсыз кылды”, – деп айтылат билдирүүдө.

ЕРӨБдүн берген отчетуна ылайык, Кыргызстан бул чөлкөмдөгү мамлекеттик сектордогу эмгек акынын жана квалификациялуу жумушчу күчкө суроо-талаптын өсүшү менен шартталган реалдуу эмгек акынын өсүшү боюнча алдыда турат. Ал эми Кытай товарларын Россияга реэкспорттоо кыргызстандык майда ишканалардын жана жеке адамдардын негизги иштеринин бири болуп саналат.

Аталган уюмдун талдоочулары Кумтөр алтын кени боюнча көптөн бери созулуп келе жаткан чыр-чатакты жөнгө салуудагы өкмөттүн ийгилиги чет элдик инвесторлордун ишенимин калыбына келтирүүгө жардам бергенин, анын натыйжасында, 2022-жылдын январь-июнь айларында 628 млн долларга чейин түз чет өлкөлүк инвестициялардын агымы дээрлик эки эсеге көбөйгөнү айтышат.

Ошондой эле ЕРӨБ республикадагы гидроэнергетика жана темир жол транспорту сыяктуу ири долбоорлорго сырттан түз инвестициялардын келишин божомолдоодо.