Борбордук Азия өлкөлөрүнүн ИДПсы быйыл 4.3%, келерки жылы 4.9%га өсөт - ЕРӨБдүн божомолу
Борбордук Азия өлкөлөрүнүн ИДПсы 2022-жылы 4.3%, 2023-жылы 4.9%га өсөт. Европа реконструкциялоо жана өнүктүрүү банкы (ЕРӨБ) жаз мезгилиндеги божомолун кайрадан карап чыкты. Бул тууралуу банктын “Аймактык экономикалык келечек” деп аталган жаңы баяндамасында айтылат.
Докладда Борбор Азиянын көпчүлүк өлкөлөрүнүн экономикасы Россиянын Украинадагы согушунан улам келип чыккан геосаясий кырдаалга туруктуулук көрсөтүп жатканы белгиленген.
Казакстан жана Түркмөнстан сыяктуу Борбор Азия мамлекеттери азыр мунай менен газдын кымбатташы жана экспорттун көлөмүнүн өсүшүнүн аркасында рекорддук кирешеге ээ болууда. Эмгек мигранттарынын кызматына суроо-талап кескин өсүп жаткан Россиядан Кыргызстан, Тажикстан жана Өзбекстанга олуттуу акча которуулар уланууда. Региондо ошондой эле реалдуу эмгек акынын жана мамлекеттик кирешелердин абдан тез өсүшү байкалууда.
«Россиянын чарбалары эл аралык төлөм карталарын бул өлкөлөрдөн алууга жана чет элдик валютадагы аманаттарын ошол жерге жайгаштырууга умтулуп жатканы Борбор Азиянын көптөгөн мамлекеттерине пайдалуу болууда. Беларустун, Россиянын жана Украинанын миңдеген орус тилдүүлөрү өз бизнестерин Борбор Азияга көчүрүп жатышат жана алар “санариптик көчмөндөрдү”, IT кызматтарынын экспорттоочуларын тартуу үчүн түзүлгөн Өзбекстандын IT-паркы сыяктуу атайын экономикалык зоналарды пайдаланышууда”, – деп айтылат маалыматта.
Натыйжада, борбор шаарларда кыймылсыз мүлк, мейманкана бизнеси жана коомдук тамактануу сектору жигердүү өнүгүп жатат.
Ошондой эле ЕРӨБ Казакстан жана Кыргызстан сыяктуу региондук экономикалар Россияга компьютерлерди, тиричилик техникасын жана электрониканы, авто тетиктерин, электроникалык тетиктерди реэкспорттоодон пайда көрүп жатышканын, бул негизинен чакан масштабдагы чакан соода жүргүзгөндөргө тийиштүү экенин белгиледи.
