Кумшекер, өсүмдүк майы, КММ, ун - Экономика министрлиги алардын баалары тууралуу айтты
Бүгүнкү күндө канттын баасы туруктуу, ошондуктан республика боюнча орточо эсеп менен 1 кг кумшекер 88.3 сомдон сатылууда. «Кошой» ААК заводунун дүң сатуу баасы 1 кг 79.2 сом. Республикада канттын жетиштүү запастары бар. Бул тууралуу Экономика министрлиги билдирди.
Өсүмдүк майы
Ошондой эле министрлик республикада өсүмдүк майынын баасы төмөндөө тенденциясына ээ экенин, сентябрь айынын башында литри орто эсеп менен 158 сомдон сатылса, октябрда орточо баа 1 литрине 155.4 сомду түзгөнүн айтат. Ири берүүчүлөрдүн орточо айлык запасы бар. Соода мекемелери өсүмдүк майын чектөөсүз сатып жатканы министрлик маалыматында айтылат.
КММ
Күйүүчү-майлоочу май (КММ) базарында баанын төмөндөшү байкалууда. Нефтетрейдерлердин айтымында, республикада КММнын жетиштүү запасы бар. Рыноктогу кырдаалга туруктуу негизде мониторинг жүргүзүлүп, рыноктун катышуучулары менен түшүндүрүү иштери жүргүзүлөт.
Белгилей кетсек, бүгүн, 12-октябрда Жогорку Кеңештин жыйынында депутат Русланбек Жакышов дыйкандар түшүм арзан болуп жатканын, солярка кымбат экенин айтып нааразы болушканын билдирди.
Министрлик Нефтетрейдерлер союзу менен биргеликте КММга болгон баанын өсүшүн ооздуктоо боюнча ар жума сайын баа боюнча сурамжылоо жүргүзүү, рыноктогу кырдаалды талдоо жана баалардын негизсиз көтөрүлүшүнө жол бербөө боюнча иш алып барып жатканын айтат.
“Республика боюнча 5-октябрга карата А-92 үлгүсүндөгү бензиндин баасы орто эсеп менен 1 литри 61.6 сомдон, ал эми дизель майы 75.8 сомдон сатылууда”, – дейт министрлик.
Социалдык маанидеги товарлардын баасы турукташып, акыркы эки айда кант, өсүмдүк майы, ун сыяктуу товарлардын баасы төмөндөөдө. Баанын төмөндөшүнө мамлекет тарабынан көрүлгөн бир катар чаралар, атап айтканда, КНСти нөлгө түшүрүү, ошондой эле экспортко тыюу салууну киргизүү таасир эткен.
Ун
Мындан тышкары, кумшекерди сатуу боюнча өндүрүүчүлөр, импорттоочулар, чекене түйүндөр, ошондой эле ун өндүрүү жана сатуу боюнча ун тартуучулар ассоциациясы менен тиешелүү келишимдер түзүлгөн.
Акыркы келишимдер баалардын абалына оң таасирин тийгизгендиктен, бүгүнкү күндө 1-сорттогу ундун 1 кг 43.5 сомдон сатылып алынышы мүмкүн.
Көмүр
Көмүр рыногунда көмүрдүн орточо баасы 1 тоннасына 5 миң 241 сомду жана импорттук көмүрдүн 1 тоннасына 6 миң 125 сомду түзүп жатканын Экономика министрлиги кабарлады.
