КР деңизге чыгууга мүмкүнчүлүк алды - БАЭ Кыргызстанга 30 га жер бөлүп берди
Бириккен Араб Эмираттары Кыргызстанга деңизге чыгуу үчүн Абу Дабидеги Халифа Портко (Khalifa Port) жакын жайгашкан КЕЗАД – (Khalifa Economic Zone Abu Dhabi (KEZAD) эркин экономикалык аймагынан 30 гектар жер бөлүп берди. Бул тууралуу минкабдын маалымат кызматы билдирди.
Министрлер кабинетинин жетекчиси Акылбек Жапаровдун БАЭге сапарынын алкагында, сооданы өнүктүрүү жана экономикалык байланыштарды чыңдоо максатында 2 негизги документке кол коюлган.
Биринчи макулдашууга ылайык, КРнын Экономика жана коммерция министрлиги жана AD Ports Group документке кол койду. Анын алкагында, Эмират компаниясы логистикалык борборду жана бажы аймагын өнүктүрүү жана иштетүү үчүн аймактагы эң заманбап портко – Абу Дабидеги Халифа Портко (Khalifa Port) жакын жайгашкан КЕЗАД – (Khalifa Economic Zone Abu Dhabi (KEZAD) эркин экономикалык аймагында 300 000 чарчы метрден ашык жерди бөлүп берген.
Экинчи макулдашууга ылайык, Maqta Gateway КРнын Финансы министрлиги үчүн бажы жана чек ара көзөмөлүн, инфраструктураны, анын ичинде улуттук бирдиктүү терезени түзүү аркылуу модернизациялоо жана санариптештирүү стратегиясын демилгелейт.
Белгилей кетсек, Maqta Gateway бул жаатта чоң тажрыйбага ээ, анткени ал Абу-Дабидеги соода жана логистикалык кызматтарды, анын ичинде деңиздеги, кургактык, абадагы, өнөр жай жана эркин зоналарды бириктирүү үчүн иштелип чыккан алдыңкы соода платформасынын, инновациялык бирдиктүү терезенин иштеп чыгуучусу жана башкаруучусу болуп саналат.
«Бул келишимдерге кол коюу эркин экономикалык аймактарды башкаруу жана секторду санариптештирүү сыяктуу тармактарда AD Ports Group ээлеген алдыңкы позицияны белгилейт жана биздин өлкөлөр ортосундагы мамилелерди чыңдоодо маанилүү кадам болот. Биздин акылман өкмөтүбүздүн экономикалык өнүгүү планына ылайык, биз башка аймактарда өнүгүүнү улантып, Борбор Азияны AD Ports Groupтун өнүгүүсү үчүн стратегиялык маанилүү багыт катары карайбыз.
Бизге көрсөтүлгөн ишеним үчүн Кыргызстандын өкмөтүнө ыраазычылык билдиребиз жана санариптештирүү, эл аралык мамилелерди өнүктүрүү боюнча жемиштүү кызматташууга үмүттөнөбүз”, – деди «AD Ports Group» Компаниялар тобунун Башкаруучу жана Башкы директору Капитан Мохамед Жума Аль Шамиси.
AD Ports Group Эркин экономикалык аймагы кластерлеринин Башкы директору Абдулла аль-Хамели КРнын Экономика жана коммерция министрлиги менен түзүлгөн Макулдашуу эки өлкөнүн ортосундагы мамилелердин жаңы барагынын башталышы болот деген ишенимин билдирди.
Өз кезегинде, Maqta Gateway аткаруучу директору Нура Аль Дахери компания үчүн Кыргызстан өкмөтү менен биргеликте бажы жана чек араны башкаруу, ошондой эле соода жана логистикалык кызматтарды интеграциялоо боюнча улуттук “бирдиктүү терезени” иштеп чыгуу боюнча комплекстүү чечимдерди иштеп чыгуу чоң сыймык экенин баса белгиледи.
