Эмгек министрлиги кыргызстандыктарды Венгрияга иштөөгө жөнөтүүгө кызыкдар. Бул тууралуу эмгек министри Кудайберген Базарбаев 3-апрелде Венгриянын Кыргызстандагы атайын элчиси Шандор Дороги менен жолугушууда билдирди, деп маалымдайт мекеменин маалымат кызматы.

Элчинин айтымында, Венгрияда жумушчу күч жетишпейт жана дээрлик 100 миң бош жумуш оруну бар. Багыттар ар түрдүү: курулуш чөйрөсү, медицина, өнөр жай ишканалары.

Шандор Дороги Базарбаевге Будапештте өтө турган венгер-кыргыз форуму тууралуу да айта кетти. Анда эки өлкөнүн бизнес жана саясий чөйрөлөрүнүн өкүлдөрү кызматташуу мүмкүнчүлүктөрүн талкуулашмакчы.

Венгрияда ишке орноштуруу эмгек жана миграция чөйрөсүндөгү кызматташтыкты кеңейтет жана бекемдейт, ошондой эле тышкы эмгек миграциясы чөйрөсүндө кеңири жана эркин маалымат алмашуу үчүн жагымдуу шарттарды түзөт.

«Эмгек министрлиги эмгек рыногун диверсификациялоо боюнча активдүү иш алып барууда. Кыргызстандыктар Перс булуңунун өлкөлөрүндө, Кореяда, Улуу Британияда жана дүйнөнүн башка өлкөлөрүндө мыйзамдуу түрдө жумушка орношуу мүмкүнчүлүгүнө ээ болду», — деди Базарбаев.