Талас аэропортунун жаңы имараты ушул жылдын аягына чейин курулат
7-апрель күнү «Манас» эл аралык аэропорту» АКК башкармалыгын төрагасы Манасбек Самидинов иш сапары менен Талас шаарындагы «Талас» аэропортуна барып, жергиликтүү бийлик өкүлдөрү менен аэропорттун терминалы менен аэродромунун курулуш иштеринин башталышын талкуулады. Бул тууралуу ишкананын басма сөз кызматы билдирди.
Самидинов белгилегендей, «Манас» эл аралык аэропорту Транспорт министирлиги менен бирдикте, асфальт-бетон төшөлгөн элементтердин андан аркы оңдоо-калыбына келтирүү иштерин өткөрүп берүүнүн жол-жобосун иштеп чыгууда. Мындан сырткары «Талас» аэропортунун аэродромунун учуп-конуу тилкеси, рулеждук жолчосу жана перрондорду оңдоп-түзөө пландалууда. Ал кошумчалагандай, бул аткарылып жаткан иштер мамлекеттин пайдасына каражаттарды үнөмдөө максатында жасалууда.
Ошондой эле жолугушуу учурунда «МЭА» инфраструктура жана региондук өнүктүрүү боюнча директору Алтынбек Мамбетов бүгүнкү күндө Талас аэропортунун жаңы имаратынын курулушунун долбоордук-сметалык иш-кагаздары иштелип бүтүп жаткандыгын айтты.
Белгиленгендей, Талас аэропорту ишке берилсе саатына 100 жүргүнчүнү кабыл ала турганга шарт түзүлмөкчү. Долбоорду ишке ашыруу мөөнөтү 2023-жылдын 3-4-кварталын түзөт. 2019-жылы «МЭА» ААКнын өз күчү менен Талас аэропортунун жерин тосуп-курчоо боюнча курулуш-монтаждоо иштери аткарылган.
