Айыл чарба өндүрүшү 10 айда 407,5 млрд сомду түздү
Кара-Суу районунун Большевик айылында Кыргыз дыйканчылык илимий институтунун пахтачылык станциясынын оңдолгон имараты пайдаланууга берилди. Аземге Суу ресурстары, айыл чарба жана кайра иштетүү өнөр жайы министри Бакыт Төрөбаев катышты. Бул тууралуу Айыл чарба министрилигинин маалымат кызматынан билдирди.
Министрдин айтымында, 2025-жылдын 10 айында айыл чарба продукциясынын дүң өндүрүшү 407,5 млрд сомго жетип, өсүү темпи 102% түздү. Кайра иштетүү тармагында өсүү 133,6% болду. Өлкөнүн айрым райондорунда помидор, пияз, калемпир жана картөшкө боюнча улуттук жана дүйнөлүк деңгээлдеги түшүмдүүлүк катталды.
Экспорттук көрсөткүчтөрдө да олуттуу жылыш бар: беденин үрөнү Россияга, ашкабактын үрөнү Японияга биринчи жолу жөнөтүлдү, жалпы 60тан ашык продукция 80ден көп өлкөгө экспорттолот. Дыйкан-фермерлерге мамлекеттик колдоо катары 10,3 млрд сом жеңилдетилген насыя жана 2 069 техника лизинг аркылуу берилди.
Ирригациялык инфраструктураны жакшыртуу үчүн 541 км канал, 588 гидротехникалык курулма, 91 насостук станция оңдолуп, дыйкандарга 5 млрд м³ суу жеткирилди. Ошондой эле 25 шаар жана 601 айылда таза суу долбоорлору ишке ашууда, ветеринария секторуна 293 млн сом бөлүнүп, бир катар лабораториялар жана имараттар курулууда.
Бакыт Төрөбаев бул жетишкендиктер айыл чарба тармагын жаңылоо, экспортту кеңейтүү жана дыйкандардын жашоо деңгээлин жакшыртуу боюнча жүргүзүлгөн саясаттын натыйжасы экенин белгиледи.
