Кыргызстанда жарым миллион аял күрүч же прокладка алууну тандоого аргасыз
Кыргызстанда эң кеминде жарым миллион аял жакырчылыктын айынан негизги жеке гигиеналык каражаттарын, анын ичинде көөк (прокладка) сатып ала албайт. Мындай корутундулар «Экономикалык өнүгүү үчүн натыйжалуу башкаруу» программасынын алкагында Idea CA билим берүү долбоору ишке ашырып жаткан «Дата инкубатордун» бүтүрүүчүлөрүнүн изилдөөсүндө жазылган.
«Дата инкубатор» программасынын үч бүтүрүүчүсү Кыргызстандагы этек кир жакырчылык көйгөйү боюнча маалыматтарды (негизинен Улутстаткомдун маалыматтарын) чогултуп, талдап чыгышкан. Алар өлкөдө 10 жаштан 50 жашка чейинки жарым миллионго жакын аял айына 3500 сомго жашоого аргасыз экенин аныкташкан. Бул сумма негизги керектөөлөргө араң жетет. Ал эми жеке гигиеналык каражаттарды, анын ичинде прокладкаларды сатып алууга көп учурда акча калбай калат. Натыйжада, жакырчылыкта жашаган аялдар «бир пачка прокладка сатып аламбы же 1 кг күрүч сатып аламбы?» деген тандоого туш келишет.
«Менструалдык жакырчылыкты» изилдөөнүн авторлору жылына орточо эсеп менен бир кыргызстандык аял жеке гигиеналык каражаттарга 4000 сом короторун эсептеп чыгышкан.
Изилдөөнүн авторлору жеке гигиеналык негизги каражаттарын ала албаган аялдар көбүрөөк ооруга чалдыгат деп эсептешет. Жыл сайын 100 миңге жакын кыргызстандык кыз-келиндер аялдардын оорулары боюнча ооруканаларга кайрылышат. Мунун себептеринин бири – бул бир жагынан жакырчылыктын айынан келип чыккан жетишсиз гигиена.
Бул өлкөнүн экономикасына түздөн-түз таасирин тийгизерин кошумчалай кетүү керек: аял оорудан улам эргүүгө чыгууга аргасыз болот, жумушка жетишпейт, ишканада жана бүтүндөй өлкөдө эмгек өндүрүмдүүлүгү төмөндөйт.
