Бийлик быйыл 10 млн жакын туристтердин келишин күтүүдө
2023-жылы 10 млн жакын туристтердин келиши күтүлүп жатат. Бул тууралуу министрлер кабинетинин төрагасы Акылбек Жапаров Чолпон-Атада өткөн ИИБдин кызматкерлерине гарнизондук саптык кароо учурунда билдирди.
Анын айтымында, бүгүнкү күнгө чейин 2 млн чукул туристтерди тосууга даярданып келсек, быйылкы жылы 10 млн жакын туристтердин келиши күтүлүүдө. Туристтик артыкчылыкты мындан ары жогорулатып, тейлөөнүн баардык деңгээлин жакшыртып, өлкөгө келген конокторго ыңгайлуу жагдайларды тартуулап, коопсуздугун сактоо - жергиликтүү бийликтин жана укук коргоо органдарынын башкы милдети.
«Эл аралык кадыр-барктуу туристтик агенттиктерди, уюмдарды, чет элдик жана ата-мекендик инвесторлорду тартуу менен иш алып барууну негизги максат катары аныктап, бул багытта ишмердикти улантабыз. Эң башкысы айлана-чөйрөнү таза сактаганга, өлкөбүзгө келип эс алган туристтердин кайра кызыгып келишине, жарандарыбызга жумушчу орундарды түзүп, ар бир аймакта жергиликтүү инфраструктуранын өз алдынча өсүү темпин колдоого карата болгон күчүбүздү жумшайбыз», - деди Жапаров.
