Эл аралык өнөктөштөр Жалал-Абаддын туризмин өнүктүрүүгө жардам берет
Президенттин Жалал-Абад облусундагы өкүлү Абсаттар Сыргабаев облустун туризм тармагын өнүктүрүү боюнча бир катар эл аралык өнөктөштөр менен жолугушту. Бул тууралуу өкүлчүлүктүн маалымат кызматы билдирди.
Такталгандай, жолугушууга эл аралык эксперт Мейв Обрайн, «Дестинация Жалал-Абад» уюмунун жетекчиси Мекен Маматкулов жана GIZ эл аралык уюмунун «Аймактарды комплекстүү өнүктүрүү» программасынын өкүлдөрү катышты.
«Жолугушууда облустун туризм багытындагы мүмкүнчүлүктөрүн кеңейтүү, 2024-2026-жылдарга карата түзүлүп жаткан программаны талкулоо, кабыл алуу багытында сөз болду. Ошол эле учурда район-шаардык туризмди өнүктүрүү боюнча координациялык кеңешмелердин ролу, облустун туристтик потенциалын эл аралык дэңгээлде таанытуу, туризм багытында иштеген ишкерлердин дараметин жогорулатуу маселелери айтылды», - деп билдирүүдө белгиленди.
Жыйынтыгында жолугушуунун катышуучулары облустун картасына түшүрүлгөн 20 туристтик маршруттар менен таанышты.
