Иран айыл чарба тармагында кызматташууга кызыкдар

2023-жылдын 2-октябрында айыл чарба министри Аскарбек Джаныбеков Ирандын Кыргызстандагы атайын жана ыйгарым укуктуу элчиси Голам Хоссейн Ядегари менен жолугушту. Бул тууралуу министрлик билдирди.

Жолугушууда айыл чарба тармагынын аспектери, анын ичинде айыл чарба өндүрүшү, айыл чарба товарларын экспортто жана Кыргыз Республикасы менен Иран Ислам Республикасынын ортосундагы техникалык кызматташтык талкууланды. Эки тарап бул жаатта кызматташууну бекемдөөгө жана айыл чарба продукциясын экспорттоону кеңейтүүгө даяр экендигин билдиришти.

Министр өлкөнүн экономикасынын негизги тармагы катары айыл чарбасын өнүктүрүүнүн маанилүүлүгүн белгилеп, Иран Ислам Республикасы менен кызматташуу Кыргызстандын айыл чарба продукциясынын сапатын жана дүйнөлүк рынокто атаандаштыкка жөндөмдүүлүгүн жогорулатууга жардам берерин белгиледи.