Кыргызстанда канча кен байлык казуучу жай бар?
Жаратылыш ресурстары, экология жана техникалык көзөмөл министринин орун басары Марат Жусупбеков Эл аралык тоо форумунда минералдык-сырьелук базаны өнүктүрүүгө жана баалуу металлдарды өндүрүүнү көбөйтүүгө багытталган приоритеттүү долбоорлорду тааныштырды.
Анын айтымында, тоо кен өндүрүү тармагы Кыргызстан экономикасы үчүн негизи тармактардын бири катары калат. Алтынга болгон дүйнөлүк баанын жогорулоо фонунда алтын кендерине болгон кызыкчылык чоң.
Мамлекеттик баланста азыр пайдалуу кен байлыктардын 51 түрү боюнча 1 000ден ашык кен казылуучу жайлар бар. “Минералдык-сырьелук база өнөр жай туруктуулугуна, жумуш орундарынын деңгээлине жана инфраструктуранын өнүгүшүнө түздөн түз таасир этет. Акыркы жылдарда эле тоо кен секторунан 218 млрд сом салык жана милдеттүү төлөмдөр түшкөн”, - дейт М.Жусупбеков.
Буга улай ал тоо кен тармагынын өнүгүшү мамлекеттин, бизнестин, илимдин жана жергиликтүү коомчулуктун кызыкчылыгы үчүн болушу керектигин баса белгиледи.
