"Кыргызнефтегаздын" пайдасы 31%га өсүп, 2,6 млрд сомго жетти
КРнын Эсептөө палатасы «Кыргызнефтегаз» ачык акционердик коомунун 2023–2024-жылдардагы ишмердүүлүгүнө аудит жүргүздү. Анын жыйынтыгы боюнча компаниянын таза пайдасы 2,6 млрд сомду түзүп, планда каралган көрсөткүчтөн 31%га жогору болду. Бул тууралуу Ekonomist.kg сайты Эсептөө палатасына шилтеме берүү менен жазды.
Маалыматка ылайык, өндүрүштүк көрсөткүчтөр жалпы пландын талаптарына ылайык болду. Пландалган 180 миң тонна нефтинин ордуна 177 миң тонна (98,3%) өндүрүлдү, ал эми газдын өндүрүшү пландан ашып, 28,2 млн м³ түздү (планда 25 млн м³), бул 112,9%га барабар.
Компаниянын жалпы кирешеси 6,2 млрд сом, чыгашалары 3,5 млрд сомду түзүп, натыйжада 600 млн сом үнөм болду.
Аудит учурунда 18,1 млн сомдук мыйзам бузуулар аныкталды. Алар негизинен дебитордук карыздын эсепке алынуусу, амортизация жана чет элдик өнөктөштөргө эсеп-фактураларды берүү менен байланыштуу. Ошол эле учурда, ишкананын ички резервдери 436,8 миң сом болду.
Эсептөө палатасы компаниянын ишмердүүлүгү мыйзам талаптарына ылайык экенин белгиледи, бирок финансылык дисциплинаны күчөтүү жана бухгалтердик эсептин тактыгын жогорулатуу боюнча сунуштарды берди.
