Тоолуу аймактарда ишкердикти колдоо боюнча жаңы долбоор ишке кирет
Президенттин Тоолуу региондорду өнүктүрүү боюнча атайын өкүлү Динара Кемелова БУУнун Азык-түлүк жана айыл чарба уюмунун (ФАО) Кыргызстандагы өкүлү Олег Гучгельдиев жана Тоо өнөктөштүгүнүн Катчылыгынын программалык координатору Жоржио Груссо менен жолукту. Бул тууралуу президенттин басма сөз кызматынан маалымдашты.
Жолугушууда "Тоо өнөктөштүгүнүн алкагында тоолуу аймактардын туруктуу өнүгүүсүн колдоо" деген жаңы долбоорду ишке ашыруу талкууланды.
Жоржио Груссо белгилегендей, Италия Өкмөтү быйыл тоолуу аймактардагы чакан өндүрүүчүлөргө жана кол өнөрчүлүк кооперативдерине грант бөлүү чечимин кабыл алган. Долбоордун алкагында фермерлерге жана кол өнөрчүлөргө гранттар, техникалык жардам көрсөтүлүп, бизнес-инкубатор жана акселератор түзүлөт. Ошондой эле белгилүү дизайнерлер менен жергиликтүү кол өнөрчүлөрдүн кызматташтыгы каралууда.
Динара Кемелова катышуучуларды тандоодо ачык-айкындык жана калыстыкты камсыз кылууну, айрыкча аялдар жана жергиликтүү жамааттар жашаган алыскы аймактарды артыкчылык менен колдоону баса белгиледи.
Олег Гучгельдиев долбоор туруктуу ишкердикти өнүктүрүп, тоолуу жамааттарда жаңы экономикалык мүмкүнчүлүктөрдү түзүүдө негиз болорун билдирди.
Катышуучулар эл аралык инвестицияларды тартуу жана демилгелерди кеңейтүүнү талкуулашты.
