Былтыр спорт тармагына 2,6 млрд сом бөлүнгөн
Министрлер Кабинетинин Төрагасынын орун басары Эдил Байсалов Дене тарбия жана спорт мамлекеттик агенттигинин 2025-жылдагы ишмердүүлүгүнүн жыйынтыгына арналган коллегия жыйынына катышты. Бул тууралуу Өкмөттүн басма сөз кзыматынан билдиришти.
Жыйында Эдил Байсалов спорт тармагына мамлекеттик колдоо жыл сайын өсүп жатканын белгилеп, 2020-жылы бюджеттен 800 млн сомго жакын каражат бөлүнсө, 2025-жылы бул сумма дээрлик 2,6 млрд сомго жеткенин айтты. Анын белгилешинче, бул мамлекеттин спортко болгон ишениминин жана спортчулар алдындагы жоопкерчилигинин айкын далили.
Ошондой эле ал 2030-жылга чейинки улуттук өнүгүү программасынын алкагында массалык спортту өнүктүрүү, инфраструктураны жаңылоо, олимпиадалык резервди даярдоо, мектептерде спорттук секцияларды көбөйтүү жана аялдар спортун колдоо негизги багыттар болорун белгиледи.
Мындан тышкары, жыйында XXXIV жайкы Олимпиада оюндары жана XVIII жайкы Паралимпиада оюндарына даярдык көрүү маселеси өзгөчө баса белгиленип, спортчуларды системалуу жана сапаттуу даярдоонун маанилүүлүгү айтылды.
Жыйындын жыйынтыгында бир катар тапшырмалар берилди:
- спорттук-саламаттыкты чыңдоо медицина борборун ишке киргизүүнү тездетүү;
- массалык мелдештерде коопсуздук чараларын күчөтүү;
- спорт тармагындагы кызматтарды санариптештирүүнү активдештирүү;
- кадрларды даярдоо системасын жаңылоо.
Ошондой эле 2026-жылы Кыргызстанда ири эл аралык спорттук мелдештерди өткөрүү, анын ичинде күрөш боюнча Азия чемпионатын, Ысык-Көлдө парустук спорт боюнча Борбордук Азия чемпионатын жана Көчмөндөр дүйнөлүк оюндарынын кезектеги этаптарын өткөрүү пландалганы айтылды.
