Салык кызматы ишкерлер менен ЕАЭБ алкагында экспортту талкуулады
Мамлекеттик салык кызматынын төрагасынын орун басары Кубанычбек Ысабеков экспорттоочулар жана кайра экспорттоочулар менен жолугушуу өткөрдү. Бул тууралуу ведомстводон маалымдашты.
Иш-чаранын максаты — ЕАЭБ алкагында товарларды экспорттоо жол-жобосун жөнөкөйлөтүү жана ишкерлерди колдоо. Катышуучуларга чек арадан өтүү, коштомо документтерди даярдоо, шайкештик сертификаттарын алуу жана электрондук эсеп-фактуралар боюнча практикалык сунуштар берилди.
Жолугушууга Экономика жана коммерция министрлиги, Бажы кызматы, Соода-өнөр жай палатасы жана «Кыргыз Экспорт» борборунун өкүлдөрү катышып, экспорттук жол-жоболорду өркүндөтүү боюнча өз сунуштарын айтышты.
Кубанычбек Ысабеков ишкерлерге: «ЕАЭБ алкагында бизнес жүргүзүүнүн мыйзамдуу жана ачык-айкын шарттарын камсыздоо — улуттук экономиканын кызыкчылыгы», — деп белгиледи.
