Кыргызстан Новосибирск шаарында дүң соода-логистикалык борборун курууну пландап жатат
Кыргызстан Новосибирск шаарында дүң соода-логистикалык борборун курууну пландаштырып жатканын Экономика министрлигине караштуу “Кыргызэкспорт” өнүгүү жана экспортту жылдыруу боюнча борборунун директорунун орун басары Тилек Жумалиев билдирди.
“Биздин Россияга негизги айыл чарба продукцияларын жеткирүүлөрүбүз Новосибирск хабы аркылуу өтөт. Ал жер бардык Урал регионуна, Екатеринбург, Карасноярск жана Якутияга чейин товарлар таралуучу өзүнчө бир транспорттук түйүн. Ошол себептен биздин өндүрүүчүлөрдүн сунушу менен бул шаарга Дүң соода-логистикалык борборун курууну пландаштырып жатабыз”,-дейт ал.
Анын айтымында, учурда Евразия өнүктүрүү банкы долбоордун техникалык-экономикалык негиздемесин иштеп чыгууга көмөктөшүп жатат.
“ТЭН иштелип чыккан соң биз температуралык режимдери жана муздатуучу кубаттуулугу менен дүң соода-логистикалык борборду курулушуна финансы тартууга жана аны куруу пландарын ишке ашырууга киришебиз”,-дейт Т.Жумалиев.
“Ошол жерден бардык товарлар жакынкы “АШАН”, “Пятерочка”, “Магнит” тармактарына, андан ары Урал федералдык округуна таратылат. Казакстан, Өзбекстандыкы бар, эми Кыргызстандыкын ачуу стратегиялык маанилүү чечим болот”,-деп кошумчалайт ал.
