Акыйкатчынын аракети менен таластык 21 жаран кайра ишине орношту
Талас облусунун 21 тургуну эмгек укуктарынын бузулушу боюнча Кыргыз Республикасынын Акыйкатчысы Жамиля Жаманбаевага кайрылды.
Акыйкатчы институтунун маалыматына ылайык, жарандар 5-16-январь күндөрү Талас шаарындагы көп кабаттуу турак жайдын курулушунда иштеп келишкен. Алардын айтымында, курулуш компаниясы 16-январда жүйөсүз негизде жумуштан бошотуп, алардын ордуна башка өлкөнүн жарандары кабыл алынган.
Маалым болгондой, жумушчулар менен расмий эмгек келишимдери түзүлгөн эмес. Бирок жумушка чыгуу журналы жүргүзүлүп, иштегенин тастыктаган фото жана видео материалдар бар болгон.
Акыйкатчы Жамиля Жаманбаева тиешелүү мамлекеттик органдарга расмий кайрылуу жөнөтүп, жагдайды кароону суранган.
Кийинчерээк курулуш объектисин жүргүзгөн компания алмашып, жаңы подрядчы жергиликтүү тургундарды жумушка алуу чечимин кабыл алган. Натыйжада февраль айында арыз ээлери кайрадан жумушка орношкону маалымдалды.
