Президент Улуттук банк төрагасына алтын куймаларын документсиз сатууну буйруду
Президент Садыр Жапаров Улуттук банктын жаңы имараты менен таанышуу учурунда банк төрагасы Мелис Тургунбаевден финансылык көзөмөлдөөчү орган алтын куймаларын кандай сатып жатканын сурады.
Улуттук банк төрагасы алтындын кымбатташы менен алтын куймаларына суроо-талап жогорулап жатканын билдирди. Ошондой эле өлкө башчы “Кыргызалтындын” баалары менен Улуттук банктын алтын куймаларына болгон бааларынын айырмачылыгына, банк алтын куймаларын сатууда жарандардан документ сурап же сурабай жатканына кызыкты.
Банк төрагасы “Кыргызалтын” алтын куймаларынын баалары 200 сомго арзан экенин жана банк жарандардын документин талап кыларын айтты.
Президент “Кыргызалтын” документ талап кылбагандыктан алардын алтыны жакшы сатылып жатканын, бир жыл ичинде аталган мекеме дүкөнүнүн ачылышына кеткен 300 млн сом чыгымды жаап койгонун билдирди. Ошондой эле С.Жапаров алтын куймаларын документсиз сатууну буйруду.
