"Ала-Арча" мамлекеттик резиденциясынын аймагында жаңы мектеп, бала бакча жана үй-бүлөлүк дарыгерлер тобу ачылды
Кечээ “Ала-Арча” мамлекеттик резиденциясынын аймагында мектеп, бала бакча жана үй-бүлөлүк медицина борбору ачылганын Агартуу министрлигинен билдиргенин “Кабар” маалымат агенттиги жазды.
Ачылыш аземине президент Садыр Жапаров, агартуу министри Догдуркүл Кендирбаева, президенттин Иш башкармалыгынын башчысы Каныбек Туманбаев жана Бишкек шаарынын мэри Айбек Жунушалиев катышкан.
Иш-чаранын жүрүшүндө президент Садыр Жапаров социалдык объектилердин инфраструктурасы менен таанышып, окуу имаратын, бала бакчаны жана медициналык борборду көрүп чыкты.
Жалпы аянты 10,5 гектарга жакын комплексте 570 окуучуга ылайыкташкан 20 кабинетижана музыкалык блогу менен эки кабаттуу мектеп бар. Ошондой эле 140 орундуу бала бакча жана 40 миңге чейин жашоочуну тейлей турган үй-бүлөлүк медицина борбору жайгашкан. Жакынкы убакта комплекстин аймагында кошумча спорттук аянтча жана воркаут зонасы курулат.
Быйылкы жылдын 10 айында республика боюнча жалпы 118 мектеп менен бала бакчанын курулушу жана капиталдык оңдоп-түзөө иштери бүтүп, пайдаланууга берилген. Жыл аягына чейин дагы 32 мектептин курулушу менен оңдоп-түзөө иштери аяктайт.
