Дарыларды онлайн издеп, текшере турган "Дары-дармек" колдонмосу иштелип чыкты

“Биринчи радио” эфиринен Дарылоо каражатары жана медициналык буюмдар департаментинин маалыматтык жана техникалык колдоо  бөлүмүнүн башчысы Нурадин Канатаев өлкөгө киргизилген дарыларды издөөгө, аларды текшерүүгө ыңгайлуу “Дары-дармек” колдонмосу иштелип чыкканын билдирди. 

Анын айтымында, колдонмо жарандардын үйдө отуруп эле 100 сомдон жогорку дарыларды издөөсүнө жана аларды текшерүүсүнө шарт түзөт. Бирок, колдонмо мамлекеттик “Кыргызфармация” мекемеси ооруканалар үчүн сатып ала турган дарыларды көрсөтпөйт. 

Колдонмонун негизги мүмкүнчүлүктөрү: 

Дарыларды издөө. Реалдуу убакыт режиминде кайсыл жакын аптекада керектүү препарат бар экенин билүүгө болот. 

Дарынын жасалма эмес экенин текшерүү. Колдонмо дарынын сертификатына жараша анын сапатын аныктоого жардам берет. 

Бааларга байкоо жүргүзүү. Дарынын маанилүү препараттар тизмесине кирген кирбегенин текшерип, мамлекет тарабынан бекитилген баасын көрүүгө болот. 

Жеңилдетилген программалар. Дарыларды сатып алууда кандайдыр бир компенсация же мамлекеттик колдоонун башка чаралары киргизилген, киргизилбегенин билүүгө болот. 

Даттанууларды берүү. Эгер жөнгө салынган препаратты мамлекет бекиткен баадан жогору сатып жатышса даттанууну чек менен кошо жөнөтүүгө болот. Арыз автоматтык түрдө ыйгарым укуктуу органга түшөт.

Тескери таасирлер тууралуу маалыматтар. Колдонмо оперативдүү аракет кылуу үчүн адистерди дарынын тескери таасирлери жөнүндө тез кабардар кылат.  

Мындан сырткары, колдонмодо медицинада жана фармацевтикада кездешүүчү терминдер сөздүгү жана көзү азиздер үчүн үн ассистенти бар. Аталган колдонмого келечекте дарыларды кайсыл убакта колдонуу керектигин эскерткен функция кошуп, аптекалар тармагын кеңейтүү планы бар. 

Н. Канатаевдин билдиришинче, колдонмодо дарыны андан жогору сатууга болбой турган чекене баа көрсөтүлгөн.