Кыргызстан Кытай менен жаңы экспорттук келишимдерди макулдашууда
Суу ресурстары, айыл чарба жана кайра иштетүү өнөр жайы министрлиги кыргызстандык өндүрүүчүлөрдүн Кытай Эл Республикасынын (КЭР) рыногуна экспорттук мүмкүнчүлүктөрүн кеңейтүү боюнча иштер активдүү жүрүп жатканын билдирди.
Кыргызстан ветеринардык-санитардык талаптар жана инспекциялык көзөмөл тартиби боюнча беш жаңы экспорттук протоколду даярдоо жана макулдашуу процессин баштады. Бул документтерге кол коюлушу менен кыргыз айыл чарба продукциялары Кытайдын кошумча рынок сегменттерине чыгарылат.
Жаңы протоколдор төмөнкү товар түрлөрүн камтыйт:
- термикалык иштетилген уй эти жана азыктык ички органдары;
- термикалык иштетилген майда мүйүздүү малдын эти жана ички органдары;
- муздатылган жылкы эти жана жылкынын ички органдары;
- жылкынын терилери;
- жылкы тукумундагы тирүү мал.
Министрлик бул беш протоколдун кабыл алынышы Кыргызстандын экспорттук потенциалын кеңейтип, ата мекендик продукциянын атаандаштыкка жөндөмдүүлүгүн жогорулатаарын белгиледи. Учурда Кыргызстан Кытайга 32ден ашуун айыл чарба жана азык-түлүк товарларын экспорттоого уруксат алган. Бул тизмектин кеңейиши кытайлык көзөмөл органдарынын ишенимин арттырышы менен бирге, кыргыз продукциясынын эл аралык сапат жана коопсуздук талаптарына жооп берерин көрсөтөт.
Ошондой эле министрлик экспорттоочуларды колдоо иштерин улантып, ишканаларды кытай инспекцияларына даярдоо, консультациялык жардам көрсөтүү жана жаңы товарларды Кытай рыногуна чыгарууга көмөктөшүү боюнча чараларды көрүп келет.
