Кыргызстанда илимий кызматкерлердин айлыктарын жогорулатуу үчүн кошумча каражат бөлүндү
Министрлер Кабинети илимий мекемелердин кызматкерлеринин айлыктарын жогорулатуу үчүн кошумча каражат бөлүү жөнүндө чечим кабыл алды. Бул буйрук 2025-жылдын 13-октябрындагы президенттин жарлыгына жана Бюджеттик кодекстин нормаларына ылайык ишке ашырылат.
Документке ылайык, Каржы министрлигине республикалык бюджеттен төмөнкү суммадагы каражаттарды которуу милдеттендирилди:
- 19 млн 239,2 миң сом — Илим, жогорку билим берүү жана инновациялар министрлигине;
- 113 млн 690 миң сом — Президенттин алдындагы Улуттук илим академиясына.
Бул каражаттар 2025-жылы илим кызматкерлеринин айлыктарын көтөрүүгө багытталат.
Каржы министрлиги аталган өзгөртүүлөрдү "2025-жылга республикалык бюджет жана 2026–2027-жылдарга болжолдуу мезгил жөнүндө" мыйзамга киргизүүдө эске алууга милдеттүү. Ошондой эле ведомство жаңы чакырылыштагы Жогорку Кеңештин профильдик комитетине буйруктун аткарылышы тууралуу маалымат бериши зарыл.
