ЖЭАЭКте экономикалык турктуулуктун артыкчылыктуу багыттары энергетикалык, азык-түлүктүк коопсуздук экени айтылды
Президент Садыр Жапаров Санкт-Петербург шаарында Жогорку Евразия экономикалык кеңешинин жыйынында 2025-жыл Бирликтин экономикалык туруктуулугун камсыз кылууга, ички рынокту чыңдоого жана кооперациялык байланыштарды өнүктүрүүгө жетишилгенин айтты.
“Биздин Бирликтин алкагындагы экономикалык кызматташтык жөн гана өнүгүп жаткан жок – ал күч алды. Өз ара соода жүгүртүү дээрлик 100 млрд долларга жетти жана бул жөн гана сандар эмес. Бул – ишенимдин, өз ара колдоонун жана өлкөлөрүбүздүн бири-бирине болгон чыныгы кызыгуусунун көрсөткүчү”, - деди Мамлекет башчысы.
Садыр Жапаров тоскоолдуктар жана чыгымдар канчалык аз болсо, Бирлик ошончолук туруктуу жана анын атаандаштыкка жөндөмдүүлүгү ошончолук жогору болорун өзгөчө белгиледи.
“Мүчө-мамлекеттер улуттук деңгээлде чечим кабыл алууда сооданын ачык-айкын, туруктуу жана болжолдуу шарттарын камсыз кылуу зарылдыгын толук эске алышы керектигин маанилүү деп эсептейм”, - деди президент.
Садыр Жапаров Кыргызстандын быйылкы көрсөткүчтөрүнө токтолуп, 11 айдын жыйынтыгы боюнча ИДП 10,2%га өскөнүн билдирди. Мамлекет башчысы өлкөлөрдүн экономикалык туруктуулугунун өз ара байланышкан элементтери катары азык-түлүк жана энергетикалык коопсуздук артыкчылыктуу багыт экенин ырастады.
Бул контекстте Садыр Жапаров агрардык азык-түлүк секторун чыңдоого, калкты коопсуз жана жеткиликтүү азык-түлүк менен камсыздоого, фермерлерди жана өндүрүүчүлөрдү колдоого, өндүрүштүн заманбап технологияларына инвестиция тартууга мүмкүндүк берүүчү конкреттүү чаралар боюнча макулдашууну сунуштады.
“Биз өнөктөштүк географиясын кеңейтүү жана эркин соода жөнүндө макулдашууларды түзүү багытын ырааттуу колдойбуз, аларды ЕАЭБге мүчө-мамлекеттердин экономикасынын атаандаштыкка жөндөмдүүлүгүн жогорулатуунун натыйжалуу куралы катары карайбыз”, - деди Садыр Жапаров жана Бирликтин өлкөлөрүнүн бизнеси ушул жылы Монголия, Бириккен Араб Эмираттары, Иран жана Индонезия менен түзүлгөн макулдашуулар ачкан мүмкүнчүлүктөрдөн толук пайдаланат деген ишенимин билдирди.
