Эски аянттагы жарманке Жаңы жыл алдында эң кызыктуу иш-чарага айланат
Буга чейин Бишкектеги эски аянтта– И.Раззаков жана Т.Абдымомунов көчөлөрүнүн кесилишинде ар жума сайын дем алыш күндөрү жарманке өтүп, анда өлкөнүн бардык аймактарынан келген фермерлердин продукциясы шаардыктарга арзан сатылып келген. Жаңы жылдын алдында жарманке кеңейтилген график менен — 2025-жылдын 26-декабрынан 31-декабрына чейин иштейт.
Бишкек шаарында жарманкелерди өткөрүү боюнча куратор — Суу ресурстары, айыл чарба жана кайра иштетүү өнөр жайы министрлигинин мамлекеттик-жеке өнөктөштүк долбоорлорун ишке ашыруу секторунун башчысы Искак Анарбековдун айтымында, жарманкеге өлкөнүн бардык аймактарынан 100дөн ашуун фермер катышып жатат.
Аянтта эркин микрофону бар атайын сахна орнотулуп, анда каалоочулар өздөрүнүн чыгармачылык жөндөмдөрүн көрсөтө алышат: ырдап, бийлеп, кызыктуу тамашаларды айтып, тематикалык лекцияларды окуй алышат.
"Биз фермерлердин маалымдуулугун жогорулатып, агартуу иштерин жүргүзүп, позитивдүү атмосфера түзүүнү каалайбыз. Ошондуктан чыгармачыл жамааттарды, ансамблдерди, Кыргызстанда жашаган бардык диаспоралардын өкүлдөрүн, ошондой эле өлкөбүздө аккредитацияланган элчиликтерди катышууга чакырабыз", — деди Искак Анарбеков.
Жарманкеде баалар элге жеткиликтүү болот, себеби, продукциялар түздөн-түз өндүрүүчүлөрдөн келет. Айыл чарба министрлигинин өкүлдөрү жума сайын негизги азык-түлүктөрдүн баасын көзөмөлдөөгө аракет кылышат. Маселен, эттин баасы 600 сомдон, картошканын баасы 40 сомдон, алманын баасы көлөмүнө жана сортуна жараша килограммы 20 сомдон башталат.
Искак Анарбековдун айтымында, соода аянтынын борборуна кайрымдуулук үчүн атайын фермердик бокс орнотулган. Ар ишемби жана жекшемби күндөрү сатуучулар менен сатып алуучулар каалаган азыктарын ошол жерге сала алышат. Жарманкенин соңунда уюштуруучулар аш басып, чогулган азыктар менен кошо социалдык мекемелерге таратышат.
