ЕАЭБде жалпы финансы рыногун түзүүнүн негизги ыкмалары бекитилди
Евразия экономикалык жогорку кеңеши Евразия экономикалык биримдигинин жалпы финансы рыногун түзүү жана мүчө мамлекеттердин мыйзамдарын шайкеш келтирүү боюнча негизги ыкмаларды аныктады. Бул тууралуу Экономика жана коммерция министрлигинен маалымдашты.
Кабыл алынган чечим экономикалык интеграцияны тереңдетүү менен бирге улуттук финансы системаларынын туруктуулугун жана корголушун камсыздоого багытталган.
Чечимдин өзөгүн дифференцияланган жөнгө салуу ыкмасы түзөт. Ага ылайык, ЕАЭБдин эл аралык келишимдеринде каралган талаптар Биримдиктин жалпы рыногунда иш алып барган финансылык уюмдарга колдонулат. Ал эми улуттук рыноктордо гана иш жүргүзгөн катышуучулар үчүн тиешелүү мамлекеттердин ички мыйзамдары күчүндө калат.
Бул ыкма интеграциялык процесстер менен улуттук кызыкчылыктардын ортосунда тең салмактуулукту сактоого мүмкүндүк берип, рыноктун катышуучулары үчүн ачык жана түшүнүктүү эрежелерди түзөт. Натыйжада финансылык кызматтардын жеткиликтүүлүгү жана сапаты жогорулайт.
