КРнын Турукташтыруу фондунун эсебинен Ош шаарында 10 мектеп салына баштады

Бүгүн Ош шаарында Кыргыз Республикасынын Турукташтыруу фондунун эсебинен 10 жаңы орто мектептин курулушу башталды. Бул маанилүү ишчарага жергиликтүү эл, башкаруу бийлигинин өкүлдөр жана Президент Садыр Жапаровдун катышышты. Бул тууралуу Президенттин басма сөз катчысы Аскат Алагөзов билдирди.

Белгилүү болгондой, 10 мектеп Турукташтыруу фондунун эсебинен курулса, мындан тышкары дагы 5 мектеп республикалык бюджеттин эсебинен салынып жатат. Жалпысынан 15 мектеп ишке берилсе, окуучулардын орун тартыштыгы 20–22%га жабылмакчы.

Ишчарага келген коноктордун алдында сүйлөп жатып мамлекет башчысы бул долбоор билим берүү тармагындагы маанилүү кадам экенин белгиледи:

“Бүгүнкү күндө Ош шаарында мамлекеттик 70 мектепте 100 миңден ашуун окуучу билим алып жатат. Тилекке каршы, мамлекеттик мектептердин сыйымдуулугу болгону 46 миңден ашуун гана окуучуга эсептелген. Бул – иш жүзүндө мектептер 2 эседен ашык жүктөм менен иштеп жатканын көрсөтөт. Бул 10 мектептин курулушу Ош шаары үчүн стратегиялык мааниге ээ. Бул кадамдар билим берүү системасындагы көп жылдык топтолгон көйгөйлөрдү чечүүнүн реалдуу жана натыйжалуу башаты болуп саналат” - деди өз сөзүндө Садыр Жапаров.

Президенттин айтымында, жаңы мектептер шаардагы орун тартыштыгын азайтып, үч нөөмөттүү окууну кыскартууга жана билим сапатын жогорулатууга шарт түзөт.