Байтик Баатыр айыл аймагында 27,82 гектар жер трансформацияланат
МинКаб Чүй облусунун Аламүдүн районундагы жер тилкесин Борис Ельцин атындагы Кыргыз-Орус Славян университетинин (КРСУ) кампусун куруу үчүн трансформациялоо токтомун кабыл алды.
Токтомго ылайык, Байтик Баатыр айыл аймагындагы 27,82 гектар жер айыл чарба багытындагы жерлер категориясынан калктуу конуштардын жерлери категориясына өткөрүлдү. Анын ичинен 25,38 гектары мамлекеттик менчикте, ал эми 2,44 гектары жеке менчикте.
Жерди трансформациялоодо КРнын Жер кодексинин нормалары жана сугат жерлерин трансформациялоого мораторий жөнүндөгү мыйзам негиз катары кабыл алынган. Аталган мыйзам мамлекеттик жана стратегиялык долбоорлор үчүн өзгөчө учурларга жол берет.
Токтомго ылайык, Аламүдүн районунун мамлекеттик администрациясы төмөнкү милдеттерди аткарууга тийиш:
- жер тилкесине үчүнчү жактардын укуктарын токтотууну камсыз кылуу;
- курулуш башталганга чейин жерди мамлекеттик менчикке өткөрүп алуу;
- кадастрдык документтерге тиешелүү өзгөртүүлөрдү киргизүү;
- шаар куруу, экологиялык, санитардык жана сейсмикалык талаптарды так сактоо.
