2026-жылдын 22-январынан тартып электромобилдерди ташып кирүүдө бажы алымы алынбайт
Мамлекеттик бажы кызматы тышкы экономикалык ишмердүүлүктүн катышуучуларына электромобилдерди алып кирүүгө байланыштуу Евразия экономикалык комиссиясынын чечимдери күчүнө кириш мөөнөттөрү жөнүндө маалымдады.
Бажы кызматынын билдирүүсүнө караганда, Евразия экономикалык комиссиясынын Кеңешинин электромобилдерге карата ташып кирүү бажы алымын төлөөдөн бошотуу түрүндөгү тарифтик жеңилдикти берүү жөнүндө чечими 2026-жылдын 22-январынан тартып күчүнө кирет.
Бул чечим Кыргызстанга ташып келүүчү «таза электр унааларына»
(ЕАЭБ ТЭИ ТН коду 8703 80 000 3) жана «ырааттуу гибрид унааларга»
(ЕАЭБ ТЭИ ТН коду 8703 80 000 5) тиешелүү.
Ушул эле күндөн тартып Евразия экономикалык бирлигинин Тышкы экономикалык ишмердүүлүктүн товардык номенклатурасына айрым транспорт каражаттарынын түрлөрү боюнча өзгөртүүлөрдү киргизүү тууралуу Комиссиянын актылары да күчүнө кирет.
Ушуга байланыштуу, Тышкы экономикалык ишмердүүлүктүн катышуучуларына - электромобилдерди ташып кирүүгө тарифтик жеңилдик жана квоталар 2026-жылдын 1-январынан тартып эмес, тактап айтканда 2026-жылдын 22-январынан тартып гана колдонула тургандыгы айтылууда.
Мамлекеттик бажы кызматы тышкы экономикалык ишмердүүлүктүн катышуучуларына электромобилдерди ташып кирүүнү пландаштырууда бул маалыматты эске алууну сунуштайт.
