Apple корпорациясы жаңы AirTag геобелгисин чыгарды
Apple корпорациясы фирмалык AirTag геобелгисинин жаңы муунун сунуштап, издөө аралыгынын кеңейишине жана үнүнүн жакшырышына басым жасаганын компаниянын расмий сайтында маалымдалды.
Аралык мурунку версияга салыштырмалуу 50%га көбөйгөнү белгиленет. Ошондой эле жаңыртылган Bluetooth чип орнотулуп, бул байкоо жүргүзүүнүн жалпы радиусуна оң таасирин тийгизди. Камтылган динамик да болжол менен 50%га катуураак болуп, белгини жакын жерден табууну жеңилдетет.
Бул түзмөктүн сатылышы кечээ күнү башталды. АКШдагы баасы өзгөрүүсүз калды: бир белги — 30 доллар, төрт түзмөктөн турган топтом — 100 доллар.
AirTag — бул Bluetooth жана UWB чиби менен жабдылган Apple’дин компакттуу белгиси болуп, ал жоголгон буюмдарды "Локатор" тиркемеси аркылуу табууга жардам берет. Аны ачкычка, рюкзакка же чемоданга тагып, картадан болжолдуу же так жайгашкан жерин көрүүгө болот. Айрым колдонуучулар белгини үй жаныбарларынын моюн боосуна тагышат, унааларга жашырышат же кийимдерине тигишет.
