Кыргызстанда бүгүнтөн тарта Индиядан жаныбарларды, эт продукцияларын алып кирүүгө тыюу салынды
Кыргызстанда 2026-жылдын 28-январынан тартып Ветеринария, мал чарбасын өнүктүрүү, жайыттар жана тоюттар кызматы Индиядан Nipah вирусуна кабылуучу жаныбарларды жана эт продукцияларын алып кирүүгө убактылуу чектөөлөрдү киргизгенин Суу ресурстары, айыл чарба жана кайра иштетүү өнөр жайы министрлигинин басма сөз кызматы билдирди.
Маалыматка ылайык, бул чаралар Индияда Nipah вирусунун очогу катталганына байланыштуу жана өлкөнүн ветеринардык-санитардык коопсуздугун камсыз кылуу максатында кабыл алынган.
Кызмат жарандарга белгисиз булактан алынган эт продукцияларды сатып албоону, ошондой эле ветеринардык коштомо документтеринин бар-жогуна көңүл бурууну сунуштайт.
Учурда кырдаал Ветеринария кызматынын туруктуу көзөмөлүндө турат.
Nipah вирусу — Paramyxoviridae үй-бүлөсүнө таандык, жаныбарлардан адамга жугуучу (зооноздук) вирустук инфекция. Ал оор респиратордук ооруларды жана мээнин сезгенишин (энцефалит) жаратышы мүмкүн. Вирустун негизги табигый алып жүрүүчүлөрү — учуп жүрүүчү жарганаттар болуп саналат.
