МСК ак ниетсиз салык төлөөчүлөрдү аныктап, мыйзамга каршы аракеттер токтотулат
Айрым ак ниетсиз салык төлөөчүлөр салыктык эсепке алуу маалыматтарын атайылап бурмалап, жалган электрондук эсеп фактурасын тариздөө жолу менен жасалма чыгымдарды түзүп, салыктык милдеттенмелерди мыйзамсыз түрдө азайтууга аракет кылышууда. Мындай билдирүүнү Мамлекеттик салык кызматынан кабарлашты.
Ушуга байланыштуу Мамлекеттик салык кызматы электрондук эсеп-фактураларды тариздөө товарлардын, иштердин же кызмат көрсөтүүлөрдүн реалдуу чарбалык операциясы жана иш жүзүндөгү кыймылы болгондо гана жол берилерин эскертет.
Билдирүүгө караганда мындай аракеттер салык мыйзамдарын бузуу болуп саналат жана мыйзамда каралган жоопкерчилик чараларына алып келет. Салык кызматы мындай мыйзам бузууларды тобокелдикке багытталган талдоо, ошондой эле заманбап санариптик жана маалыматтык системалар аркылуу аныктайт.
Электрондук эсеп-фактураны жасалма документ жүгүртүү схемаларында колдонууда жасалган бардык аракеттер аныкталып, токтотулат. Салык кызматы мыйзамга каршы аракеттерди токтотуп, ак ниеттүү ишкердик жүргүзүүгө чакырат, анткени мыйзамда каралган санкциялар сөзсүз түрдө колдонулат.
