ЕЭК Кеңеши Кыргызстанга кант чийки затын импорттоого тарифтик жеңилдик берди
Кант өндүрүү үчүн чийки зат импорттоого тарифтик жеңилдик Кыргызстанга берилгенин Суу ресурстары, айыл чарба жана кайра иштетүү өнөр жайы министрлиги билдирди.
Маалыматка ылайык, чечим Москва шаарында өткөн Евразиялык экономикалык комиссиянын Кеңешинин жыйынында кабыл алынган. ЕЭК Кеңеши Кыргызстанга кант өндүрүү үчүн керектелүүчү чийки затты импорттоого тарифтик жеңилдик берди.
2026-жылдын 31-декабрына чейин 20 миң тонна көлөмүндөгү камыш кантынын чийки заты импорттук бажы төлөмдөрүнөн бошотулат. Бул чара кайра иштетүүчүлөрдү колдоого жана ички рынокто канттын баасын турукташтырууга багытталган.
Ошондой эле ЕЭК Кеңеши Евразиялык экономикалык биримдик жөнүндө келишимге кошумча протоколдун долбоорун жактырды. Анда Биримдиктин бюджети эсебинен агроөнөр жай комплексиндеги мамлекеттер аралык кооперациялык программаларды каржылык колдоо механизми ишке киргизилери каралган.
Ведомстводо белгилешкендей, буга чейин мындай механизм өнөр жай кооперациясы үчүн колдонулуп келген, эми аны айыл чарба тармагындагы долбоорлорго да жайылтуу пландалууда.
