Калкты газдаштыруу үчүн Кыргызстанда 3% жеңилдетилген кредит берилип жатат
Бүгүн, 2-февралда КРнын Жогорку Кеңешинин Агрардык саясат, суу ресурстары, жер казынасын пайдалануу, айлана-чөйрөнү коргоо комитети "ыш менен байланышкан экологиялык абалды" кароого алды.
Анын жүрүшүндө, КРнын Жаратылыш ресурстары, экология жана техникалык көзөмөл министрлиги Медер Машиев баяндама жасап, 25 министрлик/ведомстволордон турган кеңейтилген комиссия атайын иш жүргүзүп, анын натыйжасында 2 жылдан бери ыштын басымы азая баштагандыгын билдирди.
Министрдин айтымында, Чүй өрөөнү жана Бишкек шаарындагы ыштын келип чыгышынын негизги булактары болуп:
1) кышкысын жеке сектордогу көмүр жагуу 40% ээлейт.
2) эски унаалардан чыккан ыш 30% ээлейт.
3) ЖЭБтен чыккан ыш 15% ээлейт ж.б саналат.
“Өзгөчө кырдаалдар министрлигинин “Кыргыз гидромет” станциясы жүргүзгөн байкоо жана талдоонун негизинде акыркы 2 жылда Бишкек шаарында жана Чүй обласында абанын сапаты жакшырып жаткандыгы байкалган. Жеке сектордогу көмүр жагууга карата күрөшүүдөгү негизги фактор болуп, калкты газдаштыруу саналат. Газдаштыруу үчүн 2023-жылы 8% жеңилдетилген насыя каралган. Ал эми 2025-жылдан бери ал пайыздар жеңилдетилип 3% түшүрүлдү. Жыл сайын бул максатта 150 млн сом каражат бөлүнүп турат”-деди министр.
Медер Машиевдин айтымында, газдаштыруу үчүн женилдетилген кредиттер мамлекеттик банктар - Айыл банк жана Элдик банк аркылуу жүргүзүлуп жатат.
Газдаштырууну активдүү ишке ашыруу аракетинин жыйынтыгында, жалпысынан 33 млрд сом акча каражаты жумшалып, 2014-жылга салыштырмалуу 2025-жылы газдаштыруунун деңгээли 22%дан 44 % өсүп жалпы абоненттердин саны 444 миңге жетти. Учурда Бишкек шаарында 54 калктуу конуш газдаштырылып, 51 миң абонент газга кошулду.
