Италия компаниясы Кыргызстандагы иргелбеген калдыктарды кайра иштетүүгө жардам берет
Улуттук инвестициялар агенттигинде калдыктарды кайра иштетүү боюнча инновациялык жана экологиялык жактан таза технологияларга адистешкен Италиянын TRITOR S.R.L. компаниясынын өкүлдөрү менен расмий жолугушуу өттү.
Маалыматка ылайык, жолугушуунун жүрүшүндө туруктуу өнүгүү багытында эки тараптуу кызматташтыктын келечеги, "жашыл" технологияларды киргизүү, катуу тиричилик жана медициналык калдыктарды кайра иштетүү маселелери, ошондой эле Кыргызстанда пилоттук инвестициялык долбоорлорду ишке ашыруу мүмкүнчүлүктөрү талкууланды.
Жолугушуунун жыйынтыгында Улуттук инвестициялар агенттиги менен TRITOR S.R.L. компаниясынын ортосунда кызматташтык жөнүндө меморандумга кол коюлду. Документ өнөктөштүк мамилелерди түзүүгө жана узак мөөнөттүү, натыйжалуу, өз ара пайдалуу кызматташууну өнүктүрүүгө багытталган.
Меморандумда күнүнө 200 тоннага чейин иргелбеген тиричилик калдыктарын кайра иштетүү боюнча пилоттук долбоорлорду ишке ашыруу, цемент ишканаларында экологиялык жактан таза альтернативдүү отунду колдонуу, таштанды полигондорун рекультивациялоо жана тазалоо боюнча заманбап чечимдерди киргизүү, ошондой эле мамлекеттик медициналык мекемелерде медициналык калдыктарды кайра иштетүү долбоорлорун ишке киргизүү каралган.
Мындан тышкары, жергиликтүү кадрларды даярдоо жана окутуу, инвестицияларды тартуу жана каржылык процесстердин ачык-айкындуулугун камсыз кылуу маселелерине өзгөчө көңүл бурулганы белгиленет.
