Бишкекте B5+1 форматындагы Борбор Азия–АКШ бизнес-форуму башталды

Бүгүн Бишкек шаарында Борбор Азия өлкөлөрү менен Америка Кошмо Штаттарынын мамлекеттик органдарынын жана ишкер чөйрөлөрүнүн өкүлдөрүн бириктирген B5+1 форматындагы эки күндүк бизнес-форум өз ишин баштады. Бул тууралуу Экономика жана коммерция министрлигинен билдиришти.

Форум Эл аралык жеке ишкердик борбору (CIPE) тарабынан Министрлер Кабинети менен кызматташтыкта уюштурулду. Иш-чара региондо мамлекеттик жана жеке сектордун ортосунда туруктуу диалогду чыңдоого багытталган маанилүү аянтча катары бааланууда.

Форумга Кыргызстан, Казакстан, Өзбекстан, Тажикстан жана Түркмөнстандын өкмөт өкүлдөрү, АКШнын жогорку деңгээлдеги делегациясы, бизнес-ассоциациялардын, эл аралык компаниялардын, каржы институттарынын жетекчилери жана эксперттер катышууда.

Эки күндүк программанын алкагында Борбор Азиядагы ишкердик жана инвестициялык чөйрөнү жакшыртуу маселелери талкууланат. Айыл чарба, туризм, каржы-банк сектору, транспорт жана логистика, электрондук коммерция, маалыматтык технологиялар, ошондой эле стратегиялык мааниге ээ минералдар жаатындагы кызматташтыкка өзгөчө көңүл бурулат.

Мындан тышкары, тематикалык панелдик талкуулар жана мамлекеттик органдар менен бизнес өкүлдөрүнүн ортосунда ачык диалог форматындагы сессиялар өткөрүлөт. Форумдун жыйынтыгында регионалдык ишкердик күн тартибин өркүндөтүүгө багытталган практикалык сунуштар сунушталып, тараптар кызматташууну мындан ары да өнүктүрүү ниеттерин билдириши күтүлүүдө.